زوّد قيمة الأوردر من غير ما تصرف جنيه زيادة على الإعلان: عروض الكمية وعرض ما بعد الطلب

أغلى حاجة في البيع أونلاين إنك تجيب العميل: إعلان وتأكيد وشحن. عشان كده كل منتج زيادة في نفس الأوردر تقريبًا مكسب صافي: نفس الإعلان، ونفس الشحنة، ونفس المكالمة.

1) عروض الكمية

«قطعة بـ 500، قطعتين بـ 900، تلاتة بـ 1,200». بتظهر في صفحة المنتج وصفحة الهبوط كاختيارات، والعميل بيختار بضغطة. والسعر في السلة والأوردر بيتحسب من السيرفر نفسه، فمش هيحصل اختلاف بين اللي العميل شافه واللي اتسجّل. مناسبة جدًا للمنتجات اللي بتخلص وتتشترى تاني أو اللي بتتهادى.

نصيحة: خلي التوفير واضح بالجنيه («وفّر 100 جنيه») مش بالنسبة بس.

2) عرض بعد الطلب

بعد ما العميل يخلّص الأوردر مباشرة، صفحة الشكر تعرض عليه منتج تاني بسعر خاص «لطلبك بس»، ويتضاف لنفس الأوردر بضغطة ويتشحن معاه من غير شحن زيادة. العميل لسه في حالة الشرا، ومش محتاج يكتب بياناته تاني.

• اختار منتج مكمّل: شاحن مع الموبايل، جراب مع السماعة.
• العرض ليه مدة (مثلًا ربع ساعة) وبيظهر مرة واحدة للأوردر.
• في كوديكس بيظهر للدفع عند الاستلام بس، عشان العميل اللي بيحوّل ميتلخبطش في المبلغ.

3) «يُشترى معه عادةً» في السلة

تحت منتجات السلة بيظهر منتجات اتطلبت مع نفس المنتجات قبل كده في متجرك، ولو مفيش كفاية بيانات بيظهر من نفس التصنيف. زرار «أضف» بيحطها في السلة على طول.

4) كوبون للعميل المتردد

لما العميل يحاول يقفل صفحة الدفع أو صفحة الهبوط، بيظهرله مرة واحدة في الزيارة كوبون خصم تحدده أنت («خصم 10% لو كمّلت دلوقتي»). على الموبايل بيظهر لما يرجع للصفحة بعد ما سابها أو بعد دقيقة من غير طلب.

انتبه: الكوبون ده بياكل من هامشك. احسبه من «الربح الحقيقي» قبل ما تفعّله على منتجات هامشها صغير.

إزاي تعرف إنه شغال؟

في شاشة العروض كل عرض بعد الطلب بيوريك اتعرض كام مرة واتقبل كام مرة ونسبة القبول. ولو النسبة واطية، غيّر المنتج أو السعر.

الإعدادات خطوة بخطوة في أكاديمية المتجر.