السلات المتروكة: إزاي ترجّع العميل اللي كتب رقمه ومكمّلش الأوردر
مش كل اللي بيدخل صفحة الدفع بيطلب. ناس بتتشغل، وناس بتتردد في السعر، وناس النت بيقطع عندها. اللي كتب رقم موبايله فيهم ده عميل شبه جاهز، والفرق بينه وبين الأوردر رسالة واحدة.
إزاي السلة بتتحفظ؟
في متجر كوديكس، أول ما العميل يكتب رقم موبايل صحيح في صفحة الدفع أو في فورم صفحة الهبوط، السلة بتتحفظ باسمه ورقمه ومحافظته. ولو رجع وطلب من نفس الرقم، السلة بتتقفل لوحدها وتتحسب «اتردّت» ومتظهرش تاني في قايمة المتابعة.
الرسالة: إمتى وإزاي؟
- التوقيت: بعد حوالي ساعة. قبل كده ممكن يكون لسه بيكمل، وبعد يوم بيكون نسي.
- من رقمك أنت: العميل يعرف رقم متجرك، والرسالة اللي من رقم معروف بتتقري.
- قصيرة وفيها رابط: «أهلًا، طلبك (اسم المنتج) ما اكتملش. سلتك محفوظة وتقدر تكمّل من هنا في دقيقة» + الرابط.
في شاشة «السلات المتروكة» زرار واتساب بيفتح محادثة العميل والرسالة جاهزة. الرابط بيرجّع منتجات السلة ويفتح صفحة الدفع والاسم والرقم والمحافظة مكتوبين، فالعميل يضغط تأكيد بس. ولو مفعّل كوبون عرض التردد، بيتضاف للرسالة كهدية.
متزوّدهاش
رسالة واحدة وبحد أقصى تذكير تاني. الإلحاح بيخلي الرقم يتعمله بلوك، وده بيضرّك في رسايل التأكيد بعد كده. الشاشة بتوريك كام مرة راسلت كل عميل وإمتى.
إيه اللي بيقولّك السبب؟
- سلات كتير متروكة عند خطوة الشحن؟ يمكن سعر الشحن لمحافظات معينة عالي.
- سلات بقيمة كبيرة؟ يمكن العميل عايز الدفع عند الاستلام ومش لاقيه، أو عايز يتأكد من المقاس.
- تابع «نسبة الاسترداد» في أعلى الشاشة عشان تعرف الرسايل جايبة نتيجة ولا لأ.
الشرح المصوّر في أكاديمية المتجر.
الأسئلة الشائعة
السلة بتتحفظ من غير ما العميل يكتب رقمه؟
لا، لازم رقم موبايل صحيح عشان يكون فيه حد ترجعله.
الرسالة بتتبعت لوحدها؟
حاليًّا من واتسابك أنت بضغطة من الشاشة. الإرسال الآلي محتاج حساب واتساب للأعمال.
لو العميل طلب من غير الرابط؟
لو طلب من نفس الرقم، السلة بتتحسب اتردّت برضه.
